大家行過澳門嘅大馬路，一定知道大豐銀行嘅所在，而大豐銀行嘅前身，原來係一間叫域多利嘅戲院。據歷史記載呢間戲院開業於1910年，但亦有話係1915年，但無論邊年都好，佢一定係澳門第一間最先進嘅電影院，可惜捱到1971年就停業，之後改建為銀行。點解今日會提起佢，因為有一篇關於佢嘅廣告喺網上流傳，上面寫住域多利戲院全名叫做域多利總會，又稱不夜天娛樂場，佢地方唔大，但就有齊戲院、旅館、茶樓、冰室、餐廳、花舫、舞廳同埋冰場，可以話入到去有玩有食，一應俱全；而當中舞廳仲話明有大量美女伴舞，至於有冇下文就唔知道，但喜歡夜生活嘅朋友一定會當呢度係佢哋嘅首選。至於健康嘅活動就有冰場，即係玩溜冰嘅地方。但睇戲嘅朋友，真係多得佢唔少，又酒樓、又舞廳，仲有冰場，點可以安心睇戲，除非隔音好勁。