講到澳門最具特色嘅水餃，一定非鳳城水餃莫屬，事關每隻水餃都落足材料，有鮮蝦有豬肉，又有香菇同木耳，食落口感豐富，令人回味無窮。但澳門近年多咗好多內地遊客，令北方水餃大受歡迎。前兩日上咗帝濠桑拿，佢哋嘅特色小食就係招牌湯水餃，據講全部都係師傅手工製作，唔係買現貨返嚟煮熟佢就算，所以絕對係皮薄饀靚，尤其係塊水餃皮真係又薄又滑，足可同雲吞皮媲美。一口咬落去，豬肉嘅肉汁充滿整個口腔，加埋鮮葱同香芹，味道濃淡相宜，加上師傅炮製嘅古法雲吞湯，增加餃子嘅鮮味，同時雲吞湯內充滿薑絲，香氣保留同時，令腥味全消，大大隻餃子一大碗連湯飲埋，包你有陣陣溫飽嘅感覺。