講開妓女同當舖嘅關係，原來當年妓院老闆出現周轉唔嚟時，係可以將賣身嘅妓女，攞去當舖典當，萬一到期唔贖番，當舖就會把妓女連同賣身契轉賣給其他妓院從中取利，所以當舖同妓女，甚至妓院當中有着千絲萬縷嘅關係，而且身為當舖朝奉，即係大掌櫃，除咗要識睇貨外，仲要識得睇人。據啲老街坊講佢哋訂身價時，並唔係靠雙眼，而係靠雙耳，而聽嘅並唔係囡囡嘅歌喉，而係坊間對呢位囡囡嘅評價，當時得令嘅囡囡當然叫價高啲，但如果係新人或者人老色衰嘅，咁身價自然有咁低壓咁低。而典當期間，囡囡唔使交當舖看管，可以繼續住喺妓院，當舖只收張賣身契就可以。典當妓女呢種服務，喺省港澳嘅典當史中亦只澳門至有，聽落好似好唔道德，但當舖咁做只係大開方便之門，一來替妓院老闆周轉資金，二來替囡囡安排新東家，唔使因為妓院倒閉而夾硬賣去大戶人家為奴為婢，計落做嘅係好事，幫咗啲囡囡一把添！