家陣大家都稱呼又靚女又可愛嘅女藝人做BB，例如嘉欣BB、美琪BB等等。其實BB呢個用詞唔係近年至出現，早於半個世紀前已經有人咁用，不過所指嘅女星只得一個，就係經典性感女神碧姬芭鐸（Brigitte Bardot）喇！
一代法國性感女神碧姬芭鐸於1934年出生，父親係兩間工廠嘅老闆，令佢由細到大都出入上流社會，加上媽媽對佢悉心栽培，令佢對音樂同舞蹈都有深厚認識。到15歲，就開始從事模特兒工作。踏入成年時代，碧姬芭鐸更加變得美艷動人，一頭亮麗金髮、迷人嘅大眼睛、厚而漂亮嘅朱唇俱迷倒萬千少男。喺18歲嘅時候，更獲得一次參與電影嘅機會，令佢人氣勁升，而呢部戲就係《穿比基尼的姑娘》。碧姬青春又豐滿嘅胴體於片中初露鋒芒，固然令人迷醉，佢身穿比堅尼演出，更加促使比堅尼泳裝於社會極速盛行，可謂造福萬民！家陣我哋去泳灘可以見到咁多比堅尼女郎，都要多得碧姬芭鐸咋！
《穿》片令碧姬一躍成為知名女演員，除咗得到性感小貓嘅稱號，仲畀人叫做BB，因為佢個名Brigitte Bardot有兩個B字頭。碧姬芭鐸性感火辣，拍攝寫真照片嘅時候絕不介意展露胴體每一寸，就算露毛都試過，所以瞬間迷倒萬千男兒，其大膽嘅演出，更令佢同瑪莉蓮夢露並稱為西方流行文化性感象徵，並被視為當時性解放嘅代表人物之一。碧姬咁多年來拍過嘅電影約為47部，除最出名嘅《穿》片，仲有《上帝創造的女人》、《親愛的碧姬》等。而喺《唐璜 73》當中，碧姬有多段激情床戲，仲有同女演員親密接觸嘅戲份，作風同意識都相當大膽。碧姬芭鐸已經息影好耐，現正從事保護動物權益嘅工作。
撰文：賢