好多好多年前如果嚟澳門搏殺，萬一唔好彩輸乾輸淨，惟有搵「二叔公」幫手，所謂「二叔公」就係當舖掌櫃，你可以把身上嘅值錢嘢，好似手錶、戒指、鋼筆、打火機，甚至西裝等，「舉」畀二叔公「盡當」（唔打算贖回），當到幾多錢就要嚟買船飛返香港，當年嘅當舖都開正喺賭場附近，總有一間幫到你，而喺大馬路亦有好多當舖，佢哋鄰近民區，以做街坊生意為主，每逢過年大把人爭住嚟當嘢，希望換啲錢過年，但有啲人過年唔缺錢，亦會走嚟當嘢，佢哋就係當時妓寨嘅囡囡，由於妓院過年停業，佢哋又冇人冇物，所以只能一個人留喺澳門過年，囡囡畢身積蓄都會跟喺身上，都咪話唔危險，於是有人會把所有金器首飾元寶銀元當晒畀當舖，身上只留一些零用錢和當票一張，變相將當舖變為家陣嘅銀行保險箱，夠晒安全，妓院開市後至慢慢攞番，咁都諗到，係咪要服咗佢哋呢？