男女享受閨房之樂乃係人生一大樂事，除咗可以令感情昇華，過程仲充滿快感，所以不難想像唔少男女都熱中於此，甚至有人出現性上癮情況。之不過，做愛雖然對人生咁重要，但係如果畀大家選擇，希望睇電視多啲定係做愛多啲呢？美國就有唔少人比較鍾意前者喇！話說美國資訊網站mashable.com早前進行過一項有趣調查，搵到2,210個成年人協助進行調查。問到佢哋欠缺邊一樣嘢會令其冇辦法生存落去，有73%人認為係食物，呢個好正常，冇嘢食當然生存唔到；42%答係汽車，美國咁大冇車又真係幾令人頭痛；而答係互聯網、手機以及電腦嘅人分別有28%、26%以及24%；至於做愛呢？只不過係20%，排喺睇電視嘅23%後面，唔通美國嘅電視節目真係咁有吸引力？