話說當年過馬交同筆友會面，唔係約喺大三巴就係喺露天茶座，由於大家都未見過面，而且又冇電話，所以就要喺最後一封信入面寫好晒時間地點，仲要安排一些相認之物，例如玫瑰花之類。有個笑話就係喺周日去到茶座，你會見十幾個男仔揸住玫瑰花喺度等筆友，女仔嚟到都幾麻煩，但通常失望嘅都係男生，因為啲囡囡不外乎兩種，一種係工廠妹，佢哋九成都係新移民，啱啱嚟澳門工作，只可以用村姑嚟形容，另一種就係妓女，佢哋呃啲港男過去，實際就係賣淫，但見面時會不動聲息，由於佢哋有點美色，所以港男都會聽晒佢哋話，之後囡囡就會同你吃喝玩樂，跟住就氹去開房，呢個時候囡囡露出真面目，唔肯開房就要畀幾十蚊應酬費，之後就分道揚鑣。如果開房嘅就要畀八十至一百蚊左右，當年嚟講打工仔只有幾百蚊一個月，成舊水一親香澤都幾乸脷吓，但事後就可以返香港亂吹自己嘅筆友奇情，由此愈嚟愈多香港仔上當。