上星期新西蘭有七百幾人一絲不掛咁出現當地一個著名海灘，當中有男有女，亦有老有嫩，究竟佢哋搞邊科呢？原來呢班人係響應當地電台號召，出席名為「邊緣與音樂節」嘅活動，當日一共召集到745人齊齊裸泳，據講數字打破咗去年7月西班牙所創下729人嘅裸泳紀錄，所以主辦單位準備將照片同視頻寄去申報健力士世界紀錄。有內地網友話，若然活動喺內地舉行，要召集一千幾百人絕對係濕濕碎喎！呢位網友的確係講得冇錯，之但係小弟就認為參加活動嘅人肯定會超級騎呢，拍嘅照片一啲美感都冇囉，盞笑死人！所以奉勸各位熱衷破世界紀錄嘅朋友或單位，千祈咪有樣學樣，喺內地搞同類活動，除非所有出席者都經過精挑細選，否則古靈精怪咁出場，成為國際笑話就唔好啦！