近年電視台出現好多飲食節目，共通點除咗慳水慳力，唔使大製作之外，仲一定搵靚女做主持同嘉賓。之不過，搵佢哋演出多數都只係追求視覺效果，事關佢哋一來唔識煮，二來唔識食，任何食物放入口未咀嚼都已經話好好味，邊似得日本嘅森崎友紀咁睇得又煮得！
雖然時代唔同咗，好多男人都識得亦鍾意煮兩味，但係小弟成日都覺得，娶到個唔識煮食嘅老婆真係幾淒涼，因為自己喺出面辛辛苦苦，忙忙碌碌咁工作，返到屋企梗係想食餐似樣嘅飯。好可惜，家陣嘅女仔大部分都唔願煮飯，就算肯煮都未必好食，如果娶到個老婆好似森崎友紀咁就好咯！今年34歲嘅友紀好有女人味，但係就唔會熟過龍，氣質綺麗又帶點妖媚，攝人眼神更每每將男人迷住。令男人甘心被迷惑嘅，仲有友紀嘅一副婀娜胴體喎。身高5呎5吋嘅友紀雙腿修長美觀，腰肢23吋咁幼，上圍就有34D咁豐滿，簡直就係完美呀！
現時活躍於藝能界嘅友紀同好多女藝人唔同，並唔係做模特兒又或者寫真偶像出身，因為佢本身學歷甚高，仲擁有好多專業資格。友紀小時候成日受到皮膚過敏困擾，幸好經祖母為佢悉心照料，特別係從飲食方面多加注意，令情況大為改善，亦令佢決心研究食物。友紀就讀大學選讀營養學，畢業並取得營養師資格，之後就去到一間醫院工作咗三年。後來，友紀嘅姿色被發現，有電視台人員邀請佢做天氣女郎。踏足藝能界之後，友紀同時向飲食界發展，不過唔係開食店，而係出食譜。友紀工作之餘亦冇浪費自己嘅美色，2010年推出嘅《不胖的晚餐 放心食用300Kcal》入面就除咗菜式相片，仲有三點式以及女僕扮相寫真。友紀又靚又識食，令佢深受電視台各個飲食、烹飪節目歡迎，仲被人稱為美人料理研究家添。
森崎友紀最鍾意就係宣揚健康飲食訊息，呢個由友紀開嘅網站就為大家傳授各種健康飲食資料以及健康菜譜喇！
網址：http://www.unitymagenta.com/
年齡：34歲
身高：5呎5吋
三圍：34D-23-34
撰文：賢