模影模蹤：美腿天后許恬瑜

不斷曝光

許恬瑜係台灣嘉義人，人稱小魚，出道五、六年左右，最先做網拍模特兒，令人最深刻嘅就係佢對修長美腿，被當地網友喻為「美腿天后」，但唔怕話畀大家知道，小魚只有165cm高，但拍攝嘅美腿寫真，真係性感到不得了，不少網友睇到流晒鼻血，亦因為太過吸引，所以佢初出道時，就係以美腿模特兒走紅，拍咗不知幾多輯美腿寫真。之後憑一雙美腿，殺入正式模特兒界，有時做吓車模，有時就做吓動漫代言，但做乜都好，小魚以一雙美腿，就畀網友封為性感偶像！而之後仲做埋秀場主持，有時仲客串做綜藝節目嘅助理，令佢不斷曝光，人氣一直高企！

籌募旅費

　過咗30歲嘅小魚，仍然大受歡迎，工作不斷，亦因為佢咁紅，所以去年就爆咗單新聞。話說小魚喺單親家庭長大，由母親一手一腳撫養成人，最近發現母親患有癌症，小魚好想一家人出外旅遊，歡度最後嘅時光，而小魚竟喺街頭發起「愛的抱抱」活動，希望藉此籌到一家人嘅旅費，小魚一共做咗六次，錢亦籌得差不多，但當地有媒體冇同情小魚不特止，仲指出小魚近年工作不斷，理應豬籠入水，冇理由再以籌款嚟搵旅費，仲向有關方面舉報小魚非法籌款，最後發展如何，媒體冇追蹤報道，但小魚母親知道個女咁有孝心，一定老懷安慰，此事亦令粉絲們對小魚更表支持。

好料推介

簡介：小魚喺佢個人facebook中貼咗唔少靚相，當中有工作照，更有唔少係自拍照，而且寫咗唔少感言，想更認識小魚，大可登入去瀏覽！

網址：www.facebook.com/cute.avy

許恬瑜Profile

出生地：台灣

三圍：34-23-34

身高：165cm

撰文：龍四海