澳吧吧：歡樂時光熱點

Happy Hour中文叫歡樂時光，對打工仔嚟講，放工後去酒吧暢飲幾杯何其開心，只係歡樂嘅時光又點止限於9點前，呢間Inn Side Bar可以畀到大家一整晚嘅快樂！酒吧嘅設計走簡約路線，但只要抬高頭睇嘅話，就會見天花上吊住架飛機模型，咁嘅設計唔知係咪想畀到大家一種自由翱翔嘅感覺呢？作為歡樂時光勝地，酒類選擇唔單止多，而雞尾酒亦不乏選擇，不論男女都搵到心水之選。對鍾意掟鏢嘅人士嚟講，吧內仲設有日、韓大熱嘅鳳凰電腦飛鏢機，至啱大家邊把酒談心，邊同老友嚟個鏢王大賽。