位於澳門白鴿巢前地嘅聖安多尼堂，唔知大家有冇逛過呢？呢間教堂建於1560年，屈指一算已經超過四百年歷史，係澳門三大古聖堂之一，目前嘅模樣係1930年修葺時改建，由於聖安多尼堂見證住澳門幾百年嘅歷史，所以佢嘅故事多到不得了，而最巴閉嘅一個，就同一位斷臂澳督有關。話說1706年有個年輕上尉，隨軍艦嚟到澳門，無意邂逅咗一位望族千金，兩人一見鍾情，但遭到情敵阻撓，而且兩人更爭至動刀動槍，情敵買兇殺人，但因殺手暗殺失敗，最後逼得自己出手，終把青年打傷，要切除手臂。事後情敵被捕，但青年抱怨自己成為廢人不敢接受愛人，呢位千金重情重義，寫信表白話就算青年雙手雙腳廢晒都要同佢白頭偕老，最後自然有情人終成眷屬啦，更喺聖安多尼堂舉行盛大婚禮，後嚟到咗1717年，青年人更做咗澳門總督，佢就係古爾露。