18歲女仔的確係卜卜脆好吸引，但係年紀較大女性，吸引力卻未必會輸蝕畀班妹妹仔，好似紅姑咁年過五十依然明艷照人。至於日本亦有一位經典女星，五十幾歲依然可以發放性感魅力。佢係邊位？咪就係有日本藝能界長青樹之稱嘅松坂慶子囉。
七、 八十年代，日本嘅娛樂事業相當興盛，影響力仲傳到過嚟我哋香港添！想當年，鍾意純情偶像嘅可以支持山口百惠，若然提到性感偶像，咁第一個就梗係諗起松坂慶子啦！1952年出生嘅慶子姐係南韓與日本嘅混血兒，17歲就憑住演出電影《懷孕》而踏足影壇。到19歲嘅時候，喺電影《夜間診療室》嘅演出備受好評，漸漸人氣上升。慶子姐美艷動人，氣質高貴優雅又充滿自信，所以被稱為日本第一美人。不過，慶子姐並冇因人氣上升而停落嚟，反而繼續用心演好角色，1978年佢主演嘅電影《事件》就贏得電影旬報獎、每日電影獎以及日本電影學院頒發嘅最佳女主角獎。後來嘅《蒲田進行曲》（港譯《情義兩心知》）、《男人之苦》、《一盤沒有下完的棋》，慶子姐一樣以精湛演技備受推崇，同時仲憑呢幾部作品打入中國內地市場。
慶子姐除咗參與電影演出之外，亦有唱歌同拍電視劇，作多棲發展。另一方面，仲推出過寫真集，而且係全裸寫真集添！2002年，慶子姐年屆50歲，但係嬌美胴體依然保持得相當好，所以其全裸姿態一樣極有吸睛效果。其實，裸露對於慶子姐其實唔係咩難事，因為1978年嘅電影《事件》當中，已經剝光豬拍床戲，之後嘅電影作品如《青春之門》、《道頓堀川》、《人生劇場》等，慶子姐一樣有激情床戲演出。至於慶子姐最令香港老一輩影迷印象深刻嘅，相信一定係1986年演出嘅電影《火宅之人》喇！慶子姐喺當中扮演一名身世坎坷嘅妓女，同男主角發生關係時候，快慢有序嘅呼吸聲、樂在其中嘅表情、極盡媚惑嘅胴體扭動，令人睇得血脈沸騰，堪稱日本情色片當中嘅經典，喺香港上映嘅時候當然帶來一陣哄動啦！雖然，慶子姐拍過咁多情色片，之但係絕不刻意賣弄色情淫穢，實在相當難得！
撰文：賢