漢口市有座商廈，白天係古玩城，出出入入嘅都係啲上咗年紀嘅老人家，但一入夜，其他店舖都關門嘅時候，有一間冇掛招牌嘅小店卻繼續營業，幫襯嘅客人全部都係中年漢，而且客似雲來，自然惹起街坊嘅注意，有一位熱心市民更親身去一探究竟。原來呢間小店係一間無牌經營嘅「洗浴城」，客人更衣之後就有美女行騷，客人揀啱心水囡囡就可以闢室談心，享受非一般嘅服務。呢位市民幫襯完之後，就向警方舉報，結果早前警方上門拉咗十幾廿人。有網友話呢個熱心市民深入虎穴，為社區除害，值得表揚，但又有網友推斷呢間9成係黑店，呢位市民幫襯完後，畀人屈咗好多錢，心有不甘，於是就向警方舉報，無論真相係點？無牌經營嘅色情場所，大家都係唔好幫襯啦！