喺內地進行「裸婚」，意思並唔係剝光豬赤裸裸咁結婚，而係指一對男女只去婚姻登記處辦理結婚證，唔擺酒、唔拍婚紗照、唔去度蜜月嘅結婚方式。而早前美國三藩市有一對男女進行「裸婚」，不過佢哋真係赤條條咁當街舉行婚禮，但按照當地法例，禁止5歲以上人士於公眾場所裸露下體。當日呢對男女同埋一眾親朋共約十幾人，喺市政廳前舉行裸體婚禮，更當住警員面前進行，佢哋此舉並唔係因為冇錢結婚，而係抗議赤裸身體屬違法嘅法例，新娘子係當地裸體權益運動嘅支持者，曾多次參與裸體運動而被捕。當時警員只係旁觀，未有採取檢控行動，成班人大約擾攘咗半小時就離開，「裸婚」順利完成！