澳門同香港一樣，被大海圍住，所以當地嘅露天茶座除咗開喺市中心外，當然唔少得開喺海邊，一來可以供泳客休息吓，二來可供遊人嚟（目及）吓女，好似路環黑沙海灘就有間露天茶座對正海灘，吸引唔少「塘邊鶴」嚟齋（目及）唔落水，但路環咁遠，以前未有大橋，你話去（目及）女都咪話唔辛苦，好彩以前澳門未發展前，新口岸一帶仲有唔少沙灘仔，就算開咗路之後都有一啲泳棚，方便喜歡游泳嘅朋友可以大展身手，呢啲小沙灘同泳棚旁邊，都有人投資開設茶座，好似位於現時白雲花園，即漁翁街轉出友誼大馬路附近，就有間茶座臨海而建，由於用石屎做咗個好大嘅可樂樽，所以好多人都叫呢度做「大可樂」茶座。另外，現時集美酒店位置，未填海前亦有個游水嘅地方，同樣旁邊開咗間海景茶座，日光日白嘅時候，吸引唔少「綿羊仔」同「單車友」嚟吹吓水兼（目及）吓女，到咗夜晚就變身舞場，唔少游完水嘅囡囡，就着住泳衣聞歌起舞，雖然當年只係一件頭，但都夠班後生仔流晒鼻血。