六、七十年代好興露天茶座，香港最有名嘅就係雍雅山房，而喺澳門其實亦一樣有唔少，好似喺南灣，即係現時八百伴附近，就有兩間露天茶座，一間叫占美，另一間叫銅馬，可能因為嗰度有個銅馬像，所以因此命名，而呢啲露天茶座規模冇香港咁大，想食西餐中菜就一定唔使諗，但簡單糕點，都偶爾有得供應，整支汽水，睇吓海景，吹吓海風，都幾浪漫吓，所以係年輕情侶嘅拍拖勝地，特別係香港人最喜歡捧場。以前喺香港要有車階級至可以去到雍雅山房幫襯，但嚟到澳門，坐幾蚊三輪車就到露天茶座，便宜好多，而且太陽落山時，真係幾靚o架！入夜之後，茶座就會播流行音樂，有啲似涼茶舖，當時播嘅自然係貓王或者披頭四嘅歌。勁歌一播，自然就成為跳舞場，好多香港仔都話喺度跳舞，都可以輕鬆獵艷，而且除咗陀地妹外，連混血葡妹都溝到，至於真定假，真係要問吓啲四五十後嘅老友啦！