冬天最好就係食臘味，個人最喜歡就係食鮮膶腸，無論喺飯煲蒸熟定係做餸，都一樣咁惹味，特別係老字號嗰幾間嘅臘味，就更係好食到唔使講，而澳門嘅臘味，冇乜邊間特別出名，但並唔代表冇好嘢，要識路嘅朋友至買到，所以呢頭啲有經驗嘅大廚，都識得窿路買到好嘢。講多無謂，前日喺大富豪桑拿，我就食咗個臘味炒蘭芹，全部用馬交正宗臘味做，啲臘腸同膶腸好味到不得了，同香港啲老字號有得揮，加上大廚用咗新鮮唐芹做配菜，一陣陣清香令原本非常肥膩嘅臘味，除咗有肉香油香外仲有淡淡芹菜嘅清香，令人食慾大增，而荷蘭豆嘅香甜，令成碟菜完美配合，而大廚仲好似唔使本咁，臘肉大大片，喜歡食膶腸嘅我，食到唔停得嘴，絕對值得推介。