九十年代澳門廣州街一帶，樓上住咗唔少夜場囡囡，佢哋唔想返工或者休息期間，就會冇收入，正所謂手停口停，為咗有啖飯食，就會走落樓下打躉，向啲途人招手，希望有人食個「快餐」，就可以搵啲使用，而當時囡囡向啲途人兜搭嘅開場白都係千篇一律，就係：「先生！去不去？」去邊度？當然係去囡囡家作客啦！呢句話係咪好有印象呢？加埋唔鹹唔淡嘅廣東話講出嚟就更有味道！
當年一個單身男人，如果由街頭行到街尾，最少會被十幾二十個囡囡搭訕，就算唔想偷食嘅朋友都會專登行一行呢條街，一來可以（目及）吓女，由於全部都係大場嘅囡囡，所以質素唔差，當年啲朋友成日話遇到湖南鞏俐、四川嘉玲嘅靚女，二來就係行完一轉被咁多靚女主動兜搭，仲全部被你拒絕，可以話傷盡天下美女心，咁係咪開心死呢？滿足感攞足一百分。所以呢條街雖然冇乜嘢賣，但仍然絡繹不絕就係咁解！
撰文：小德