內地玩動漫Cosplay嘅朋友如果玩得出色，可以兼職身份收出場費，行內尊稱佢哋為「Coser」，而要數當中最有名氣嘅，千夜未來絕對係其中一個，圈中可以話無人不識！
嚟自江蘇鎮江嘅千夜未來，真名不詳，報稱係位OL，曾經做過會計、銷售管理同埋網站編輯，被網友喻為最多才多藝嘅Coser。未來中學時代才開始接觸動漫，但自此就被深深吸引着，之後喺網上結識到一班志同道合嘅朋友，仲玩埋Cosplay添。由於未來樣子甜美，身材出眾，稍為墊吓，上圍就做到巨乳動漫女主角嘅效果，拍攝出嚟嘅Cosplay照片，真係幾可亂真，所以一直深受網友嘅歡迎，但每次置裝都貴到不得了，所以只能一邊打工，一邊繼續玩Cosplay，而直至多年前有網絡遊戲公司睇中搵佢做Coser，自此就成為佢嘅工作，最後仲做埋全職添！
現時未來除咗做Coser，仲會做埋平面模特兒。有記者問佢會唔會趁住人氣咁勁，進軍埋其他媒介呢？佢好客氣咁話暫時唔會，專心做好目前工作就已經好足夠。有記者問佢對愛情點睇？佢話喺愛情路上曾經受傷過，而且仲好多次添，但呢啲打擊冇令佢對愛情失望，覺得適合自己嘅另一半，一定存在，只係暫時未能遇上，而每當抬頭望着天際嘅時候，你嘅另一半，亦會同時望住你。少女嘅愛情觀，真係詩情畫意，雖然阿妹佢一口文藝腔，但用調皮活潑嚟形容佢則絕不為過，事關同佢合作過嘅Coser或攝影師都話，一唔小心就會被佢玩死，咁全面嘅靚女，實有排紅呀！
簡介：要數收藏最多千夜未來照片嘅網站，一定係佢嘅專屬微博，裏面有好多輯性感寫真，加上自拍同花絮照，足夠你睇幾個鐘呀！
網址：http://weibo.com/senyamiku
出生地：江蘇
三圍：34-23-34
身高：160cm
撰文：龍四海