唔知係咪呢排蒲得多冇乜胃口，於是老友就幫忙點咗道南乳雞柳炒藕片，話保證可以令人胃口大開，佢果然冇推介錯，呢道炒藕片賣相吸引唔在講，濃香南乳氣味更係令人食欲大振！
據師傅介紹呢道菜嘅秘訣，係要先將南乳加入已爆香嘅蒜蓉中炒一陣，咁先至可以充分帶出南乳嘅濃香，然後再將已走油嘅雞柳同埋嫩身蓮藕倒入南乳醬中炒勻，最後加水、糖等調味，一道脆口、鮮味兼濃香嘅南乳雞柳炒藕片便大功告成。師傅仲話蓮藕具有相當高藥用價值，不但具有開胃清熱嘅作用，更可滋補養顏，秋冬進食至為有益。撰文：魂