要數澳門最多人聚集嘅酒吧，「The Roadhouse Macau」應入三甲，咪睇佢得嗰千呎鬆啲舖位，相信除酒店，呢度可能係最多外國人聚集兼好氣氛嘅地方，閒閒哋過百人喺度暢飲。事關酒吧勁多Event搞，幾乎每個月梗有兩鑊，除咗基本嘅節日慶祝、音樂盛事外，仲係逢體育必殺：足球、籃球、欖球、單車甚至賽車佢哋都唔放過，至於今晚嘅重頭戲，唔使問都知係熱刺對曼聯啦，到時氣氛肯定相當熱烈。佢哋除咗直播賽事之外仲會有大抽獎，將氣氛推到最高潮，最過分係啲侍應仲吹得兩嘴，同佢哋講波一樣搭到嗲。另外不時仲有優惠推出，好以啱啱過咗嘅澳門格蘭披治賽車，女士就有免費任飲，難怪咁多人撐場啦！