話英國兩大名牌大學牛津同劍橋係世仇一啲都冇誇張，事關佢哋唔單止鬥成績、鬥划艇，家陣連「裸」景都要鬥埋！事關早排劍橋大學搞咗個「年度美背」選舉，選出五男五女裸背靚相冇耐，牛津大學嘅學生網站亦照辦煮碗，搞咗個「美臀比賽」，並聲稱候選男女嘅質素比劍橋嘅更正，做得比劍橋更好咁話。從佢哋嘅網站可見，5名男候選者都係全裸背向鏡頭，背景則以校園為主，而5名女候選者則身穿性感內褲，臀部勁貼鏡頭，論性感度又好似真係比劍橋高啲喎！唔知呢次選舉，會唔會好似劍橋搞嘅嗰次咁，引嚟相當大嘅回響呢？
撰文：魂
賽車女郎嘅造型，個個地方嘅都差唔多，清一色短裙長靴加低胸衫，大家嘅分別只係顏色有啲唔同，睇得多唔止悶，而且真係冇乜特色。較早前美國德州舉辦咗個大型賽車，佢哋同樣搵嚟大批囡囡擔任賽車女郎，但佢哋嘅制服就甚有自己嘅特色，照片出街後，受到網友一致好評。睇番照片，囡囡一身白色，下面係牛仔短裙，頭上更戴頂白色牛仔帽，一身性感牛仔女郎嘅打扮，凸顯德州係牛仔之鄉嘅特色，令網友大力讚好。而有網友心水清，更留意到佢哋嘅外露乳罩，統統用鮮紅色，紅白兩色一撞，更凸顯囡囡胸部嘅線條美，難怪個個囡囡都咁矚目耀眼啦！
撰文：小德
有網友爆料話北韓嘅空姐換制服啦！消息傳出後不少網友四出打探，終於畀佢哋搵到新制服嘅照片，睇吓有乜轉變。以前嘅制服係以紅色套裝為主，裏面配件白恤衫，頸項再綁條絲巾，而裙嘅長度一律及膝，但網上流傳嘅新制服照片，裙嘅長度明顯短咗四五吋，而外套不再係西裝款，而係大圓領，而恤衫就變成小低V上衣，明顯露出頸項同銷骨位置，而頸上嘅絲巾亦冇埋，露出嘅肉真係多咗，但離大家嘅性感標準，仲差好遠。新制服更適合工作需要，搬搬抬抬時唔使綁手綁腳，反而更有親切感，好明顯係有進步！
撰文：小德
11月15日有25個喺湖北武漢經濟學院讀書嘅美少女，換上一身白色婚紗，婀娜多姿咁喺校園內做起婚紗秀嚟，吸引大批學生圍觀，呢批美女並唔係恨嫁，而係參加咗一個環保活動，主題係推廣低碳生活，而點解又要着婚紗呢？原來呢班美少女背後，仲有25位婚紗設計師至係主角，佢哋只能以三米長嘅紙巾設計一件婚紗，最後以人氣票選為冠軍。但最有趣嘅就係活動前一兩日，竟有學生喺學校討論區內希望當日落大雨，唔通唔想活動進行定係別有用心呢？睇嚟係別有用心居多，因為着住紙巾婚紗嘅美少女被大雨淋，唔春光乍洩都幾難，最後天公作美全日放晴，令有心人願望落空！
撰文：小德