內地將11月11日稱為「光棍節」，呢日係一眾單身男士聚首聯歡嘅日子，但發展至今竟變成商機無限。早前日本女神蒼井空獲邀參加北一個「脫光派對」，一眾粉絲自然購票捧場啦！
話說呢個節日係四個大學生發起，由於11月11日係四條一，令四個單身大學生觸景傷情，於是喺網上發起每年呢日為「光棍節」，作為聚會嘅日子，發展至今竟變成商機無限，主要係夜場同酒吧之類，老闆們會搵啲性感女歌手同舞蹈員返嚟，同班單身男士狂歡盡興，之後就變為相親活動。每年光棍節，各地嘅大型景區同商場，都會舉辦大大小小嘅相親活動，希望參與者快啲脫離光棍行列，亦因此衍生出「脫光趴」，意思係脫離光棍嘅活動或者派對，所以大家喺11月前後見到商場同景區有「脫光」活動，唔使緊張，只係光棍節嘅活動而已。
而今年就鬧出笑話，話說前AV女星蒼井空會喺北京出席某大網絡商舉辦嘅「脫光趴」，消息傳出後吸引過萬粉絲圍住現場，門票仲炒高好幾倍。當日蒼井老師着得十分密實，載歌載舞兼玩完遊戲之後，就轉身走人，一件衣服都冇脫，活動後竟惹起部分人士不滿，經解說後至知誤會一場。除咗「脫光趴」外，網購出現銷售額新高峰亦值得留意，原來唔知幾時開始，網上流傳單身者喺光棍節為未來女友買下名貴禮物，心上人就會好快出現接收你嘅心意，於是搞到今年人人爭住買禮物，仲創下銷售高峰添。
撰文：小德