自由嘅可貴在於大家都有選擇權，只要唔影響到別人就冇問題喇。之不過，好多人卻鍾意限制別人嘅自由，又或限制別人鹹濕嘅權利，而美國經典情色片《性書大亨》，就係講主角點樣為大眾爭取欣賞鹹書嘅權利而奮鬥喇！
《性》片講述男主角拉利係鄉下一個窮小子，為咗出人頭地，年輕嘅時候就諗出好多搵錢計劃。轉眼間，二十年過去，搖身一變成為一間脫衣舞廳嘅老闆。拉利本身都唔係咩正經人，而其身份亦吸引到好多脫衣舞孃垂青，同佢哋發生關係嘅次數多不勝數，但係芸芸脫衣舞孃當中，拉利只鍾意出身於破碎家庭嘅美麗舞孃艾依斯。
二人經歷多番激情，感情開始變得穩定，艾依斯仲建議拉利創辦一本刊物嚟推銷舞廳，拉利覺得意見甚好，於是一本激情澎湃，極度露骨嘅色情刊物《Hustler》就呱呱落地。刊物不以美感為重點，主打低俗淫穢，卻又吸引到好多草根階層欣賞，銷量節節上升，瞬間令拉利飛黃騰達，踏上富翁之路。
《Hustler》如此出位，令好多衞道之士禁不住要發聲。後來拉利被人屈與黑幫有關，繼而將佢收監。拉利收監五個月後被釋放，發現廣大市民表示支持，即使幾辛苦都好，都要為自己搞鹹書以及大眾睇鹹書嘅權利而戰鬥。好不幸，拉利為捍衞自由受到槍擊，令佢下半身癱瘓，更因為刊物涉及誹謗宗教領袖而被告。呢場官司一打多年，幸而有一名熱心嘅律師幫手，最終幫拉利打甩罪名，只可惜佢老婆卻已經因愛滋病而死去。
《性》片故事取材自真人真事，以一代成人娛樂界猛人Larry Claxton Flynt嘅傳奇故事做藍本，令電影引人入勝。雖然電影嘅激情場面唔多，但係肉體橫陳、波濤洶湧嘅場面亦有不少，令作品添上無限「色」彩，大大滋潤觀眾嘅眼睛。
撰文：賢