韓國人對美嘅要求十分之高，好似今日介紹嘅模特兒崔玉珍，出道時人靚身材好，被稱為四大賽車女郎之一，但因面部皮膚出現問題，拍照時需加厚粉底，就被喻為「厚粉女神」。
1982年出生嘅崔玉珍，由於身材高挑，樣子甜美，所以細細個就畀人搵去做模特兒，起初只係拍吓啲少女時裝硬照，但都好受歡迎，只不過當時網絡未發達，所以未能走紅，直至大個女做賽車女郎，由於玉珍表情豐富，深受龍友們嘅歡迎，事關只要鏡頭一對住佢，可以火速三連拍，甚至六連拍，即係攝影師按連環快拍，玉珍可以同步變換造型，大頭、半身定全身都冇問題，所以佢嘅照片數量多到不得了，加上放喺網上流傳，隨即令玉珍人氣急升，與同期嘅黃美熙、李智友、林智慧合稱韓國四大賽車女郎。
由於玉珍面部皮膚麻麻，每次拍攝時都要打好厚嘅粉底，換轉其他地方，厚粉定薄粉邊有人去關注？但韓國係講究美嘅地方，所以有啲批評就話佢係「厚粉女神」。有唔靚嘅地方，你可以去整靚佢，但玉珍決定我行我素，你叫我整，我偏唔去整，對批評一於少理，而且呢啲評論話唔定就係整形公司嘅手段，玉珍受唔住壓力真係走去整，佢哋就會大事宣傳，玉珍唔理批評，反而更得民心。玉珍至今仍活躍於模特兒界，有時更會上上電視節目，又靚女又有性格，抵佢紅足咁耐嘅！
簡介：呢個網頁收藏咗崔玉珍出道以來嘅多輯寫真，特別係初出道時嘅車模照更係人見人愛，成為人氣模特兒，絕對實至名歸。
網址：http://myfavorites.jonai.net/Korean/Choi_Yu-Jung/index.html
出生地：南韓
三圍：33-24-37
身高：172cm
撰文：龍四海