澳門Style：雜菌炒牛柳

烹調牛肉嘅方法，個人認為中式只有炆牛腩最正，其餘都認真麻麻，就以牛柳為例，充滿咬口同肉汁嘅牛柳，以西式香煎嘅方法最能保持原汁原味，所以我食親牛柳，一定要以西式烹調，但呢個觀感日前被大富豪桑拿嘅大廚打破咗。事關當日上到去，聞到好香嘅牛肉味，原來係大廚以西式烹調方式去煮牛柳，再配中式猛火快炒，做出香氣撲鼻，肉汁豐滿嘅雜菌炒牛柳。大廚話選用澳洲靚牛柳，稍稍調味就用牛油香蒜起鑊乾煎，當牛柳底面稍熟，就攞起切條備用，之後放入各式雜菌快炒，再把牛柳回鑊，隨即把秘製醬汁倒入鑊內，炒至乾身就上得枱。食落肉香撲鼻，最正係啲雜菌吸晒肉香醬汁嘅味道，令人食到唔停得口！