小弟我一向都用情專一，因為知道一腳踏兩船雖然係過癮，但係一個唔小心好容易陰溝裏翻船，被揭破後分分鐘會被女伴去勢。至於女士亦應該要堅守貞節，千祈咪左右逢源，如果唔係就好似韓國經典情色片《方子傳》入面嘅女角咁，冇好下場喇。
《方子傳》故事講述富家子李夢龍帶住隨從方子進京赴考。上京之前，夢龍就帶埋方子一齊去妓院開心一下。去到妓院，二人就被老闆娘個女春香所吸引，春香唔單只又靚女又知書識禮，仲識彈琴跳舞，真係令二人暈得一陣陣。
見過春香之後，夢龍對佢念念不忘；而方子雖然知道主人嘅心情，但自己亦難忍對春香嘅思念，加上佢一直都覺得自己飽受主人嘅奴役，一心起老細尾注，搶先一步搵春香表白，發現春香早已被方子嘅粗豪同壯碩身軀吸引，於是二人即刻享受魚水之歡。然而，春香係就係好鍾意方子，但係佢心入面又好想攀龍附鳳，嫁入豪門，於是亦向夢龍投懷送抱，仲私訂婚約。之後李夢龍上京赴考，而春香則同方子繼續鬼混。
夢龍高中之後，春香梗係搵佢攞着數啦！不過，夢龍向佢提出一個計劃，就係要春香色誘南原使道，然後再反抗而被收監，再命令方子捨身尋找南原使道貪贓枉法嘅證據。此計果然成功，春香安全獲釋，而南原使道則被查辦，夢龍更加因此獲朝廷連升兩級。此後，三人一齊生活。之不過，夢龍知道春香一心左右逢源，所以最後都係忍唔住，喺一次外出遊玩嘅時候，借頭借路使開方子，然後狠心將春香推到水潭浸死。
《方子傳》改編自韓國經典故事《春香傳》，情節緊湊又多元化，劇情相當有張力。至於演繹女主角春香嘅女星趙如晶，當然先係全片嘅重點啦！趙如晶美艷動人，具有一種攝人風韻，加上其豐滿身材以及激情床上演出，令本片嘅情慾場面睇頭十足，正呀！
撰文：賢