澳門青樓除咗歷史悠久同組織完善之外，仲規矩多多，聽啲老街坊講，喺青樓打工嘅朋友，有三件事一定唔錯得，如果錯咗就後果嚴重，分別係叫錯寶號入錯廳、記錯棋譜行錯子，同埋攞錯毛巾拎錯盤，馬上同大家逐一解釋。話說妓院門口總有一兩名門童，類似家陣嘅知客，佢哋記性特佳，客人嚟過一次就記得佢哋嘅大名同寶號，下次再嚟就馬上可以叫出客人係某某寶號嘅某某大少爺，叫得夠響夠威，客人就會有打賞，但如果記性唔好，每次都要問客人攞料，自然冇得打賞啦；萬一叫錯咗，後果更可大可小，小則跪地叩頭賠罪，重則可能畀人打一身。除咗小心叫錯名外，更唔可以帶錯客人入錯廳，如果入錯嘅廳有客，正係青樓大忌，而冇客只得小姐獨坐，某某大爺也可能會見異思遷。呢個時候客人點開嘅小姐會下令責罰佢哋，門童屁股開花絕對唔少得！