內地十一黃金周，正係餐飲同旅遊業搵錢嘅大好機會，就好似湖南某個旅遊景區就別出心裁，喺長假期推出「少爺小姐菜」，即時引嚟不少人排晒隊幫襯。睇番佢嘅菜單，不外乎坊間常見嘅貴價菜式，好似桂花魚肚、三絲魚翅、鍋巴海參等，但佢之所以能夠咁火爆，網友話成功在於包裝。好似客人嚟食「少爺菜」，餐廳就安排三個着晒妹仔衫嘅侍應，為客人全程服務，飲飲食食都唔使自己郁手，真係名副其實嘅「殘廢餐」，而且客人喜歡嘅仲可以換埋少爺裝，齊齊玩埋Cosplay添，單係滿足感就已經值回票價。但有網友話此風不可長，明顯將舊社會封建思想重新延續，特別會助長一班暴發戶，更看扁勞動人民，去唔去食就大家諗諗啦！