知情色趣:裸體上堂 抗議苛政

匈牙利有間大學,因為學生嘅衣着過於隨便,於是定咗一條新校規,規定男女學生嘅衣着,包括髮型同飾物,結果搞到一眾學生幾乎剝光豬嚟作出無聲抗議!

滿室春光

匈牙利Kaposvar大學早排公布大學生服裝新規定,女學生禁止穿着膝頭以上嘅裙、低胸衫,亦唔可以化妝同佩戴飾物,男生則必須着深色西裝兼唔可以着短褲,只有喺炎熱時先至可以着較清涼嘅服裝。有10名藝術學院嘅男女學生不滿呢個新規定,決定裸體上堂作出抗議,搞到課室滿室春光。

作出解釋

呢班學生事後解釋,第一學校之前冇規定上課時着乜,所以佢哋喺課室着成點並不存在違規嘅問題;第二課室冇開冷氣,當日戶外有成30度,室內溫度相對更高,所以學生脫下衣服嚟調節體溫;第三課室內老師最大,加上佢哋係藝術系,喺老師要求和教導底下,學生們裸體,係好平常嘅事!學生答嘅三點,合情合理,校方自然冇嘢好講,唔知佢哋嘅抗議最後能否令校方收回成命呢?

撰文:小德