由於鍾意寧靜，家陣落酒吧都要遠離嘈雜不堪嘅劈場，專揀靜靜地兼且裝修雅致嘅英式酒吧，澳門亦有呢一類酒吧，好似位於威尼斯人度假村嘅麥時利愛爾蘭酒吧（McSorley’s Ale House）就係其中之一喇。呢間酒吧裝修雅致，入到去仲好似進入愛爾蘭嘅尋常家庭一般咁溫暖舒適，加上牆壁上擺滿來自十九世紀嘅擺設、飾物同手工藝品，為酒吧添上濃濃嘅維多利亞式古典風格，如果客人換上武士裝，感覺就真係好似時光倒流一樣喇。酒吧提供嘅酒類飲品繁多，最受歡迎嘅一定係同酒吧名字相同嘅麥啤，當然名牌威士忌以及紅酒亦可以為客人提供更多選擇啦。有酒又豈可以無餚呢！英式風味嘅小食如炸魚薯條同炸魷魚圈，夠晒飽肚兼且可以增強抵抗酒精能力嘅酥皮牛肉批以及漢堡亦一應俱全，就算係唔鍾意飲酒嘅人士去到亦一樣食得開懷滿足。