四五十年代澳門內港附近有好多艇舫，裏面有食有玩，只要有客上艇，就會點起燈籠，各類供應都會憑燈而至。當客人揀好所需後，船上雜工就會分配工作，食物就會交另一艘伙食艇進行烹製，歌女樂師就會上艇準備獻藝，客人可以隨意點唱。至於搵囡囡，就算最低微嘅艇妹，亦唔係話嚟就嚟，據講艇舫有自己一套規矩，當歌聲響起，載着囡囡嘅花艇就會抵達，雜工會通報，例如：紫仙舫彩鳳姑娘到！洛神艇明月姑娘到等，客人便會起身相迎。
囡囡坐下後會同客人談笑聽歌，一曲過後才決定去留，但當時啲客人比較怕醜，唔敢彈女，所以會讓囡囡留下，當飯菜做好後，艇舫就會應客人要求開出碼頭，去風涼水冷嘅地方賞月聽曲，而玩得開心，囡囡同客人亦會獻唱，同家陣卡拉OK差唔多，當飲飽食醉後樂師歌女會撤走，只剩下囡囡招呼客人，而艇舫後設有包房，可供客人歡度良宵，嫌唔夠味道，亦可轉戰囡囡自己艘花艇，幫襯花艇大多連埋嫖宿，所以花費亦貴好多！
撰文：小德