韓國模特兒眾多，佢哋嘅活動時間一般較，而且工作變動甚少，就算單做硬照模特兒都可以屹立十年八載，而成功例子就係今日要介紹嘅靚女方恩英。
今年已經31歲嘅方恩英，面上真係一啲歲月痕迹都冇，仍然好似廿五六歲嘅樣子，而且隨着年紀愈大，恩英就愈有女人味，相比剛出道時一臉稚氣，令人有不一樣嘅感覺。恩英原本喺京畿大學讀書，修讀嘅係「裝身具」設計。乜嘢叫做「裝身具」？即係飾物咁解，後嚟畢業後都想喺番呢行發展，但喺偶然機會下接觸到模特兒工作，以恩英樣子身材，好快就走紅。佢最先就係做車模，韓國嘅車模並唔係出席展館騷，露露身材咁簡單，由於當地有唔少賽車場，所以佢哋係要喺車場上日曬雨淋，普通囡囡做得兩三年就會殘晒，但如果你咁都唔殘，就證明你實力過人，可以突破車模範疇，試做其他產品，例如時裝或美容等，以上界別恩英都一一做過，但令佢火速上位，就係轉戰動漫界做代言模特兒。
韓國嘅動漫或者網絡遊戲，可以話世界聞名，佢哋嘅代言人除咗紅遍韓國外，仲可以走出世界，而恩英就參與過多次大型網絡遊戲嘅代言工作，所以內地同唔少亞洲地方，都對恩英十分熟悉。身材唔算火辣嘅恩英，上圍只得33吋，但佢嘅性感寫真，周不時製造出波濤「胸」湧嘅效果，內地嘅網友就對佢更為追捧，佢嘅寫真只要一推出，大家就會爭相轉貼，情況十分墟冚。有媒體問佢會唔會再轉戰其他界別，例如拍戲唱歌等，恩英十分客氣，佢話自己做模特兒都有一段日子，但仲有好多嘢要學，暫時都唔想分心，只想做好目前嘅工作，回報粉絲就足夠啦！真係識講嘢！難怪得到咁多粉絲支持。
簡介：呢個係方恩英內地粉絲幫佢開嘅官網，目前照片較少，但就純中文，可以認識恩英嘅同時，又可以睇吓靚相，正呀！
網址：http://baike.baidu.com/view/3278643.htm
出生地：南韓
三圍：33-23-34
身高：168cm
撰文：龍四海