宅男天地 ：動感美少女

於2008年推出嘅格鬥街機電玩《蒼翼默示錄》，當年以出色嘅遊戲性及人物設定，而深受電玩迷歡迎，其人氣至今仍未減退，相關模型長出長有，好似當中嘅女角色諾愛兒．梵密利歐就係呢期最新推出嘅模型作品。飄逸嘅秀髮加兩條飄動嘅絲帶，動感十足，不過講到吸睛位，就肯定係諾愛兒一對奶黃包，同埋一雙修長美腿，不論上睇下望，定係從後面欣賞，同樣養眼度十足，加上手工出色，令觀賞性大大提升，絕對係佳作！