宅男天地：火辣騎士

有巴打話家陣日本嘅戀愛題材十八禁電玩，男主角郁啲就同一眾女角肉搏，搞到戀愛劇情薄弱晒。想有多啲機會同女角色談情嘅話，呢隻主打輕口味嘅十八禁電玩《少女騎士物語More & More》就啱晒你。呢個外傳作品故事承接前作《少女騎士物語》進行，故事圍繞男主角水野貴弘同青梅竹馬女伴兼騎士主人希咲美櫻，喺騎士學園發生嘅故事。自從水野同希咲奪得騎士比武大賽冠軍後，學園內一眾美少女不但對水野刮目相看，更紛紛向佢示愛。面對一眾美少女嘅纏擾，又要氹打翻醋埕嘅希咲美櫻，睇怕水野今勻都好難收科！