印象當中，內地有名氣嘅模特兒，嚟自雲南嘅囡囡比較少，唔通因為係南方人，個子小而不受重視？其實模特兒界只重實力，不重省籍，好似今日要介紹嘅靚女武順冰，佢就係雲南臨滄人，被喻為模特兒界嘅新寵兒。
武順冰小時候冇諗過做模特兒，平時只喜歡唱吓歌，但都唔係要嚟表演，只係隨口哼吓，後嚟入讀雲南經濟管理職業學院，修讀商科。呢個時候武順冰已經十八九歲，長得亭亭玉立，樣子秀麗，身高更有173cm，喺學校裏算係鶴立雞群，自然追求者眾，但佢冇日日掛住談戀愛，反而喜歡做外拍模特兒，更學習走騷同擺甫士。喺2009年，佢參加咗中國東方美少女大賽，獲得廣州賽區十佳，殺入全國大賽時，更奪得最優秀選手嘅殊榮，之後再參加校園天使大賽，又獲得全場總冠軍，小妮子可以話一夜成名，人氣急升。
武順冰冇話趁勢入行，只客串性質接啲攝影或者廣告嚟做，有網友估計佢因為唔係專科出身，所以冇乜信心，直至遇上佢嘅伯樂，即係佢經理人，喺對方極力游說下，終於簽約成為專屬模特兒。經理人公司亦提供好多訓練，令佢信心大增，近年工作不斷，成為炙手可熱嘅模特兒。武順冰仲有樣嘢不能不提，入行都有兩三年，但緋聞一啲都冇，除咗工作就係工作，亦冇自製出位話題，算係一個循規蹈矩嘅模特兒，由此更得粉絲支持，令佢嘅人氣有增無減。
出生地：雲南
三 圍：33-24-35
身 高：173cm
撰文：龍四海