就算幾老友都好，結咗婚之後，男士好少會邀請他回家宿一宵，因為老婆通常都會反對。若然老婆唔反對就更為不妙，因為佢對你老友冇惡感，萬一兩者之間有咩瓜瓜葛葛，到時真係引狼入室喇。不過，若然老友係女人又點呢？結果可能都係一樣！唔信？可以睇吓經典情色片《情迷六月花》。
亨利係一名小說作家，雖然有才華，又散發出一種睿智神采，但卻未被人賞識，欣賞佢嘅只有老婆仔阿珍。阿珍除咗為亨利付出關愛，對佢百般照顧，仲為賺錢養家而出賣肉體，寄望有朝一日老公可以成為名作家，並且可以為自己寫一本傳記。另一邊廂，銀行家雨果同小說評論家老婆安兒生活得正正常常，但係就偏於沉悶，而雨果知道安兒為咗完成作品而絞盡腦汁，於一次偶然機會遇到亨利之後，就將亨利介紹畀安兒認識，希望安兒有更多靈感。之不過，安兒見到亨利就發覺對方正係同自己最夾嘅人，內心嘅慾望漸漸解放，更加同亨利展開一段不尋常關係。
安兒解放內心感情嘅時候，又有另一個人令佢迷倒，就係亨利身邊充滿魅力嘅老婆阿珍喇。安兒被阿珍嘅氣質同舉止深深吸引，仲漸漸受感染而變得愈來愈大膽野性。後來，阿珍為咗賺錢離開亨利一段時間，安兒一方面責備亨利冇體諒阿珍嘅困苦，一方面亦同亨利享受床上歡愉，解決自己嘅性需要。當阿珍回歸，亨利手上嘅小說亦告完成，可惜嘅係阿珍對小說大表不滿，二人仲爭吵起嚟。呢個時候，安兒就安慰阿珍，趁機同佢錫錫，原來佢對同性嘅阿珍一樣有興趣！及後安兒唔小心講出自己同亨利嘅私情，搞到阿珍發晒火再離開。最後，安兒就同老公離開呢個城市，遠離生命中兩個能夠令佢將慾望解放嘅人。片中嘅交歡場面唔算好激，但係手法唯美，突出浪漫情懷，充滿美感又挑逗人心。最重要係扮演安兒嘅葡萄牙裔演員Maria de Medeiro胴體鮮嫩婀娜，演出又夠投入，見到佢由淑女變成蕩婦嘅重大轉變，相信好多男觀眾都意識到一種偷嗒人妻嘅刺激。
撰文：賢