香港歌舞廳日漸式微，聽見藝人話登台表演，通常都意識到佢哋係去海外登台。不過，情況喺日本就唔同，因為當地有好多表演場館，好多藝人都主打登台搵銀，好似木本夕貴咁近期就以演出舞台劇為主，兼且擁有自己嘅劇團添！
人氣超強嘅日本美少女組合AKB48，紅遍亞洲，名氣同吸引力當然係無出其右，當中嘅成員又嫩口又可愛，就算係獨立發展亦相當有叫座力。不過，屬於AKB48姊妹組合嘅SDN48雖然係後來者，但係成員嘅吸引力一樣唔會輸畀前者，SDN前成員木本夕貴就證明呢一點喇。26歲嘅夕貴妹五官標致，氣質美艷又帶有一種純潔治愈效果，個人覺得佢有少少似十年前叱咤一時嘅火辣水着妹森下千里。如果將兩者嘅身材相比，夕貴亦同師姐千里不相伯仲，雖然冇千里咁高挑同纖巧，但係夕貴嫩口白滑嘅肌膚，配合32C-23-34嘅三圍，有前有後，相對於千里古銅色嘅胴體又別具一番清新觀感，要我二擇其一，我亦毫無疑問咁答係夕貴妹。
夕貴妹喺2010年加入SDN48，成為第二期成員，憑住甜美清新嘅形象而備受賞識，仲爭取到好多幕前演出機會。阿妹除咗挾住SDN48之名參加電視台綜藝節目做表演嘉賓，又唱又跳展現其青春活力之外，亦因為身材好而拍過唔少水着DVD同寫真照。到今年3月，夕貴就從SDN48中畢業，轉作個人發展。而阿妹好快就喺5月搵到一個重要嘅演出機會，就係參演由知名女演員西村知美主演嘅電影《家》喇。拍電影嘅機會真係難能可貴，夕貴都明白到呢一點，所以演出時特別用心，除此之外，更將大部分精力分配到舞台演出之上，作品包括《美好的星期日，淡色的啤酒》。據聞因為夕貴嘅舞台劇演出甚有熱誠，舞台劇團體負責人好欣賞佢，為阿妹成立咗一個「劇團木本夕貴」，畀夕貴一手一腳負責，睇嚟佢有機會成為舞台王者喎！
家陣木本夕貴醉心於舞台劇演出，仲要處理埋劇團各種事務，真係好忙，不過大家可以從佢博客當中，知道阿妹喺幕後玩得幾咁開心。
網址：http://ameblo.jp/u-kiiboo/
年齡：26歲
三圍：32C-23-34
身高：5呎3吋
撰文：賢