台灣嘅模特兒生態，同內地好唔同，佢哋都係十八九歲出道，但最快要捱到廿五六歲，至會爆紅起來。今日介紹嘅台灣新一代性感模特兒趙妍歡，同樣從小入行，已經25歲嘅歡歡，係時候發圍啦！
趙妍歡少女時代已經做兼職模特兒，當時以歡歡做藝名，接些龍友嘅戶外拍攝工作，由於樣子娟好，身材出眾，所以拍到佢嘅龍友，都會第一時間將照片貼上網。只要有歡歡嘅照片貼上網，就會火速轉貼，而且點擊率爆晒燈，所以小小年紀就已經稍有名氣，後嚟畢業後，曾抉擇應否全職做模特兒，經過幾番掙扎，最後下定決心朝模特兒嘅路發展，但當做全職時，會發現唔係想像中咁簡單，單係搵經理人已令佢十分頭痛，後嚟搵到個志同道合嘅經理人，佢嘅事業才正式起步，時間飛逝，蹉跎咗幾年，要再起步，就要加倍努力，歡歡惟有頂硬上。
以歡歡嘅完美身材，要一下子令人印象難忘，最好就係走性感路線，一改以往純情少女嘅形象，當時歡歡都有掙扎過，但條路唔行都行咗一半，惟有豁出去，於是接拍不少內衣或泳衣產品照片，照片一出竟然引起哄動，網絡上不斷熱捧歡歡，轉眼間更成為新一代嘅性感偶像，雖然闖出名堂，歡歡仍然十分低調，經常逛夜市隨街食嘢，有人問佢仲想做幾耐？佢話志玲姐30歲才被人賞識，隋棠姐亦要27歲至走紅，所以佢話自己一啲都唔急，只要做好本分，機會一到，自然會更上一層樓。身材好兼心態正確，歡歡絕對有機會成為台灣新一代天后。
簡介：趙妍歡嘅網站多到不得了，但數最全面一定係佢嘅「面書」莫屬，裏面有不少自拍照，而且仲會同網友分享心事添，值得瀏覽。
網址：www.facebook.com/yanhuan.zhao
出生地：台灣
三 圍：34-23-35
身 高：166cm
撰文：龍四海