日本情色電影當中嘅經典系列除咗有《花與蛇》之外，仲有《禁室培慾》。呢個系列講述有女仔被陌生男人捉返屋企禁錮，經對方嘅悉心照顧，兼且了解到對方內心空虛之後，就由恨生愛，繼而神奇地接受呢個男人。其實，《禁室培慾》系列當中男主角嘅做法，好早已經有人用，《綑着我，困着我》嘅男主角相信就係佢哋嘅先驅喇！
《綑》片講述由拉丁情聖安東尼奧班達拉斯飾演嘅後生仔瑞奇，自小失去父母，輾轉喺孤兒院、勞教所以及精神病院度過多個歲月。到佢23歲嘅時候，瑞奇終於得到自由，過住自己鍾意嘅生活，而佢最希望得到嘅就係一個老婆、一個家庭以及一份穩定嘅工作。之不過，由於佢多年來少同人接觸，所以思維同行為都有少少異於常人，搞到佢冇乜朋友，更遑論搵老婆呢！呢個時候，佢記起某一次從精神病院逃走，去到一間酒吧並且結識到一位叫做瑪莉亞嘅小電影女演員，當晚嘅一夜情令佢畢生難忘，更由此愛上對方。於是瑞奇就四出尋訪瑪莉亞芳蹤，可惜相遇嘅時候對方已經忘記當晚發生嘅事，仲認為瑞奇係白撞。瑞奇一時心急，就將瑪莉亞用繩綁起帶返家中，將佢綁喺床上再耐心表白愛意。你無端端綁架自己兼玩繩綁，係人都會驚你同憎你啦！瑪莉亞亦係一樣。
幸好瑞奇對瑪莉亞愛護有加，更加為咗滿足佢「不可一，不可再」嘅壞習慣，而外出同毒販交涉，仲被人打到遍體鱗傷。瑪莉亞本已成功趁瑞奇離開嘅時候解開繩索，但係當佢想逃走嘅時候就見到瑞奇滿身傷痕返嚟，仲知道係為咗自己至畀人打。瑪莉亞終於畀佢感動，決定接受瑞奇，同時展開瘋狂嘅交歡，重演多年前一夜情嘅快樂時光。後來，瑞奇諗住帶瑪莉亞返鄉下澳洲旅行，點知落街諗住偷架車起行嘅時候，瑪莉亞就被不知情嘅家姐帶走咗。傷心又失落嘅瑞奇惟有返回家鄉。當瑞奇返到家鄉呆望四周景色之際，卻見到瑪莉亞同佢家姐駕車而至，三人最後一齊坐車旅行，展開幸福嘅新生活。片中女主角被禁錮嘅情節，其實同《禁室培慾》相當接近，但係《禁》片第一集拍攝於2000年，而《綑》片則攝於1989年，所以佢可以算得上係《禁》片嘅「參考」對象。《綑》當中嘅交歡場面盡展二人嘅亢興情緒，激情非常，固然值得欣賞，而男主角坦率又勇敢嘅愛情亦值得各位男士學習，話畀大家知尋找真愛其實唔使咁複雜，當然大家千祈唔好學佢咁將對方捉返屋企綁住嚟玩啦。
撰文：賢