藝能界有幾好搵都好，藝人始終都係打份工，萬一人氣大不如前，工作量減少，好可能要做番個普通人。如果識諗嘅話，及時轉型做老闆就最穩陣喇！前AKB48成員川崎希就係咁醒目，家陣已經成為時裝品牌老闆，兩餐無憂之餘，仲可以間中出嚟拍水着寫真騷哥利，實在令人羨慕！
日本近幾年最紅最具話題性嘅組合，相信唔係SMAP，就係由青春美少女組成嘅AKB48。呢個組合美少女多不勝數，亦好似當年早安少女組咁將班成員換來換去，為觀眾提供無限新鮮感。不過，小弟我就唔多喜歡，因為本人淨係鍾意有女人味嘅女性，2009年從AKB48畢業嘅川崎希咁樣就啱胃口喇！希妹今年25歲，女人味開始源源散發，一雙深情眼神更加攝人心神，呢種就係好多男人都鍾意嘅初熟感覺喇。身材方面，希妹同好多AKB48成員一樣，上圍冇乜料到，但係勝在皮膚白淨，胴體勻稱冇多餘贅肉，擺個S形姿勢，望上去更顯迷人曲線美。
川崎希其實相當叻女，因為佢考入AKB48絕對唔容易。有幾難？2005年當年應徵嘅女仔接近八千個，經過各種考核同評審之後從中挑選出24人，阿妹就係其中之一，係咪叻先？自此希妹就跟住組合四圍演出。不過，阿妹咁忙都抽時間出嚟培養興趣，仲獲得唔少資格，包括英語水平考試準一級、有氧潛水證書，以及宇宙研究組織JAXA俱樂部名譽會員。畢業之後，希妹就着手搞自己嘅時裝品牌「Anti minss」，一年之後仲開設指甲美容院。據佢透露，呢三年入面營業額已經突破一億日圓，唔怪得佢早前接受訪問嘅時候表示，本來想買架跑車，不過由於公寓嘅車位唔夠大，於是就買咗一間獨立屋方便泊車啦！依家阿妹除咗做社長，亦間唔中拍水着寫真，重溫往日做AKB48成員嘅時光。
川崎希家陣成日寫博客，同時會將佢設計嘅時裝放上博客畀網友品評，大家有興趣都可以上去畀意見。
網址：http://ameblo.jp/kawasaki-nozomi/
年齡：25歲
三圍：34 - 22 - 33
身高：5呎3吋
撰文：賢