一百幾十年前醫學尚未普及，遇上奇難雜症，老百姓食藥都唔好時，就只好求神拜佛，而澳門好多廟宇都有醫病嘅傳說，但要數「冧巴溫」嘅一間，就非氹仔嘅醫靈廟莫屬，呢間廟建於1900年，裏面供奉醫靈大帝，佢本身唔係一個歷史人物，而係集古代醫仙醫聖，及醫術高明人士嘅一個化身。據講當年澳門如果有人患咗傳染病或者痲瘋病，就會把病人送過嚟氹仔休養，實際就係等佢哋自生自滅，而有好心人就喺度起咗呢間醫靈廟，希望幫下啲病人，點知真係有好多病人慢慢好番，消息傳出後，唔少澳門人只要有怪病，都會過嚟求醫。但由於當年由澳門嚟氹仔，舟車勞頓，唔係人人都頂得住，於是有人喺福慶街包公廟旁邊，亦起咗一間，所以澳門有兩間醫靈廟，想方便嘅就過去福慶街，想誠心啲嘅，就會選擇嚟氹仔，但隨着醫學進步，老百姓有病，當然要睇醫生啦。