最近上網瀏覽見有幾本同床單有關嘅書，原來都係講述兩性關係，唔知幾時開始，滾床單已成為性愛嘅代名詞。而上個月喺台灣又出版咗一本，書名叫《滾床單的性福秘密》，作者呂政達來頭不小，學歷係心理學博士，喺大學教過心理學，再睇埋佢之前嘅作品，全部都係教學生處世之道或親子關係，正氣到不得了，但原來佢同時亦寫咗唔少兩性關係嘅專欄，會唔會將滾床單寫得淡而無味呢？點知出版後好評如潮，而且仲被網友讚佢文筆幽默風趣，而且旁徵博引，每個論點都有實例支持，至於內容亦好大膽，第一篇就講高潮，第二篇就已經講到體位，最後仲暢談各地性文化同埋點評全球性學大師，內容一啲都唔會悶，不妨買本嚟看門口。