講起以辣聞名嘅地方菜，唔可以唔提中國八大名菜之一嘅湘菜。由於湖南天氣潮濕關係，因此當地人喜以有祛濕功效嘅辣椒入饌，而其中一道廣受歡迎嘅美食就係剁椒魚頭。雖然坊間嘅剁椒魚頭做法眾多，所揀選嘅魚頭種類亦各不相同，但要做到一道美味嘅剁椒魚頭，卻一定要魚頭嘅鮮味同辣椒嘅香味共冶一爐，先至為之上乘。今次介紹嘅呢道剁椒魚頭，師傅揀選咗好肉又新鮮嘅大魚頭，先用料酒同薑絲醃製，然後喺醃好嘅魚頭上鋪上剁椒，跟住放入鑊內蒸，最後再加葱花及淋上滾油，上枱時鮮辣香氣撲鼻而嚟，真係令人食指大動呀！