日本嘅風俗店形形色色種類繁多，從人妻、水手服、OL、泡姬等乜都有，只係講到當中最奇怪、最令人難忘嘅，則要數呢間「Triple Red Card」風俗店。事關佢開宗明義，嚟親玩嘅男士一係對另類風俗孃有特殊狂熱，一係已抱有患上風俗店恐懼症嘅心理準備！
當大家進入呢間位於日本大阪嘅「Triple Red Card」風俗店嘅網頁（網址：red-card.info），便會發現佢寫住三項警告聲明：（一）可以令你家庭變得圓滿！只係嚟過之後可能會有心靈創傷；（二）適合作為男人間嘅賭注；（三）歡迎一般色情場所已經無法滿足嘅特殊狂熱者。究竟乜嘢可以令到嚟玩嘅男士心靈創傷，又有乜嘢可以滿足到有特殊需要嘅男士呢？大家只要入去佢哋嘅「在籍名單」，即係駐場風俗孃名單後，就會明白點解佢會有咁嘅警告字眼。皆因店內嘅30多位風俗孃，個個「分量」十足之餘，造型仲相當嚇人，從打扮成河童嘅熟女、蒙面小丑摔角手、瘦到皮包骨嘅病婦，到全身由頭到腳包晒鋁箔嘅金屬人都有，果真係奇形怪狀乜都有，咁大家明白佢點解會話令爛滾男士嘅家庭生活變得圓滿，同埋可以作為男士間嘅賭注，作為負方嘅大懲罰。
可能有人會問既然開得風俗店，點解唔會用嚟賺錢，反而要搞得咁趕客呢？其實呢間風俗店係以搞笑為主，一班另類風俗孃希望透過奇裝異服帶畀男士歡樂。此外，呢班風俗孃個個性格都相當開朗，唔單止講得笑又識搞笑，佢哋更經常喺風俗店嘅博客上發放笑彈，幫助男士減壓。大家咪以為呢間風俗店生意唔慌好，情況恰好相反，據講每晚10點到半夜係佢哋嘅黃金時間，而嚟玩嘅男士更多到要預約添！至於講到風俗店嘅正題，即係色慾服務方面，係咪真係會有玩家幫襯呢？有風俗孃認真地表示，佢哋確係會提供色慾服務，而內容同一般風俗店無異。講到服務費，每60分鐘從10,000日圓起錶，折合約780港元，抵唔抵玩或會唔會去玩就自己諗諗喇！