鹹趣濠江：妓女要交稅領牌

話說澳門喺鴉片戰爭前，娼妓係「三不管」，清政府官員不管，葡國人不管，當地華人亦不管，但鴉片戰爭後，葡人正式接管澳門，就喺1887年頒布《新訂澳門娼寮章程》，要求性工作者一律要向政府繳納稅款，領牌後至可經營，而除咗妓女，妓院亦一律要領牌，無牌經營者，當然要拉人封艇，罰款兼坐監啦！所以妓院老闆同囡囡都只好乖乖哋交稅，咁做有幾種好處，一係澳門政府有大批稅金收入，二就係可以監控妓院同妓女數目，好似喺1930至1940年期間就有記錄顯示，澳門登記嘅妓院有120間，而妓女就有一千五百多人。有人會問囡囡數目冇咁少啩？當然，千五人分落百二間妓院，每間只有十幾人，點搵食呀！原來妓院仲有好多等同家陣骨場嘅受訓、實習囡囡，唔少未領牌嘅就偷偷地喺度「試業」，加上仲有好多冇登記嘅「暗娼」，所以實際人數一定不只呢個數，足見當年馬交係如何繁榮「娼」盛！