澳門Style：蒜蓉蒸開邊蝦

上桑拿場食飯，真係愈嚟愈有意思，好似前兩日同班朋友過馬交，諗住沖吓涼、揼吓骨，於是上大富豪桑拿，點知個個上到去至話肚餓，於是先入休息室睇吓有乜嘢食，大廚問我哋有冇興趣整個海鮮餐，除咗炒蟹和蒸魚外，最正就係「蒜蓉粉絲蒸開邊蝦」，隻隻都係海蝦，每隻蝦都有三吋幾咁長，蒸出嚟蝦殼鮮紅，一睇就知新鮮，碟開邊蝦一到，蒜香撲鼻，識食嘅朋友一定先食粉絲，我都唔例外，粉絲爽滑彈牙，吸收晒蒜蓉同鮮蝦嘅肉汁，真係回味無窮，即刻扒佢大半碗飯，之後再食嫩滑爽脆嘅鮮蝦，好快就消滅咗佢，最後搞到一滴汁都冇剩。呢個「蒜蓉粉絲蒸開邊蝦」套餐，只收28蚊份咋！記住呢度唔係酒樓，供應有限，賣晒就冇！