英國馬壇進入六月，大賽一浪接一浪，英女王嘅愛駒，更贏得其中一個杯賽嘅冠軍，話說衝過終點一刻，平時不苟言笑嘅英女王都開心到跳起嚟拍掌歡呼。英國各地馬場嘅大賽，除咗有皇室人員參觀，女士們亦會着到靚一靚咁出席，但最別出心裁，都係佢哋頭頂上嘅帽，花款愈嚟愈誇張外，近年更趨向3D化，即係以立體效果示人。女士們起初戴帽係代表禮貌，後嚟就變為傳統，近年就變為表現個性和創意嘅活動，英國馬場嘅「帽子大賽」，除咗吸引英國人參加，亦吸引不少外國人參加，有網友話香港馬場都要學吓人，但唔好鬥帽，不如鬥晒身材啦！
撰文：小德