嚟澳門食麵，除咗鳳城水餃麵出晒名之外，豬手麵亦係一絕，當地嘅柱侯豬手真係獨步天下，諗起都流晒口水。日前去到金池桑拿，大廚一見到我，馬上介紹佢秘製嘅「香菇豬手煲」，見佢信心十足，於是就叫佢整煲嚟歎吓！大廚入去十零分鐘，一煲香噴噴嘅豬手煲就出現我嘅眼前。除咗落足柱侯醬外，仲加入其他秘製醬汁，令香味更濃更有層次感，加上豬手炆得腍，入口即時融化。豬肉帶有濃汁嘅幽香，令人食指大動，即時叫咗兩碗白飯嚟食。不得不提就係啲香菇，完全吸收晒豬油同濃汁嘅香味，所以一片香菇都可以送半碗白飯，所以三扒兩撥就食得光光，滿足感爆晒燈。